IONION
- Nome: Ionion
- Tipo de barco: mercante, vapor
- Bandeira: Grega
- Data afundimento: 15 de agosto de 1925
- Causa: embarrancado
- Lugar: punta de Buítra (Muxía). Por localizar
- Nivel de mergullo: –
- Territorio GALP: Costa da Morte
HISTORIA
Esquivou a I Guerra Mundial, naufragou en Muxía
Cargado con 1.500 toneladas de chatarra que transportaba de Londres a Huelva, o Ionion truncou o seu traxecto no corazón da Costa da Morte tras medio século de servizo e superando un ataque directo na I Guerra Mundial oito anos antes.
Os 15 tripulantes lograron salvarse e foron atendidos por pescadores que se atopaban na zona. Tras o naufraxio, foron trasladados a terra nunha lancha de motor enviada polo comerciante de Muxía, don Manuel Martínez.
Outro suceso, pero con mellor fin e tamén acontecido no mes de agosto, cubría con honra a ficha de servizos do Ionion. Co nome de Othalia, foi torpedeado polo submarino alemán UC 31 o 7 de agosto de 1917 cando se atopaba a 50 millas ao leste das illas *Órcadas, no norte de Escocia (Reino Unido). Naquela viaxe transportaba madeira de Malmö (Suecia) a Londres. Remolcado á capital do arquipélago, Kirkwall, engadíuselle unha nova sección de popa por Hawthorns & Co Ltd, en Leith (Edimburgo).
Características do Ionion
Vapor tipo compound, 120 NHP, 73,5 x 10,1 x 4,4 m, 1164TRB. Casco de aceiro.
Construído: 1880, Palmer’s Shipbuilding & Iron Co. Ltd., Newcastle-Upon-Tyne, Nº 43.
Armador: Razis S. G. (Ionian SS Co. Ltd.).
GALERÍA