Miradoiros de Santa Irene, Vilela e porto de Razo

Desde estes tres puntos hai unhas excelentes vistas dos coñecidos como baixos de Baldaio, uns fondos rochosos considerados un cemiterio de barcos por ser un perigo para a navegación marítima. Apenas dúas pedras velan sobre a superficie. Con mar en calma son moi difíciles de ver e máis en días de néboa. Con algo de mar ou temporal, identifícase facilmente como as ondas rompen a pouca distancia da costa.

Nesta zona localizáronse os pecios do Solway e do Tunstall,

cuxos naufraxios relatamos aquí. Os fortes temporais dalgún inverno tamén deixaron restos de barcos na bocana da ría de Baldaio.

Desde terra, os baixos poden situarse entre a lagoa de Baldaio e o cordón dunar, a medio camiño entre os portos de Malpica e Caión (A Laracha), desde onde hai uns 20 minutos de navegación (5 millas náuticas). É un lugar moi rico en pesca.