Barómetro do Serpent

Outra das pegadas materiais do naufraxio do H.M.S Serpent (10/11/1890) é o barómetro colocado na fachada do número 3 da rúa Alcalde Noguera Patiño, mirando ao porto de Camariñas. Foi, entre outros, un dos agasallos da Mariña Real británica en agradecemento aos veciños polo auxilio prestado aos tres sobreviventes e polos labores de procura e rescate dos 142 corpos enterrados despois no Cemiterio dos Ingleses. Un barómetro é un instrumento para medir a presión atmosférica.

O alcalde recibiu un reloxo e o cura de Xaviña, que “enterrou aos protestantes”, unha escopeta coa lenda “The Lords Commisioners of the British Almiralty” na empuñadura. Durante moito tempo, cada aniversario do naufraxio, achegábase á zona un barco de guerra inglés que honraba aos defuntos cunha coroa de flores e abastecía ao párroco con munición para a arma.